Astma- og ofnæmisfélag Íslands er svo heppið að eiga hlaupara innan sinna raða sem hlaupa til góðs í Reykjavíkur maraþoni Íslandsbanka og hefur svo verið undanfarin ár. Í ár söfnuðust 80.500 krónur og munar um minna. Þau sem hlupu fyrir AO voru Kolbrún Einarsdóttir, Stefán Þór Finnsson, mæðurnar Vigdís Ylfa Hreinsdóttir og Tinna Jónsdóttir, „fjórar frænkur“ þær Margrét Sigmarsdóttir, Hera Jóhannesdóttir, Anna María Frímannsdóttir og Elín Jónasdóttir en þær hlupu boðhlaup og skiptu með sér 42 km leið. Síðast en ekki síst var það ungur piltur Lárus Bjarki Helgason sem hljóp 3 km til styrktar félaginu.

Stjórn Astma- og ofnæmisfélags Íslands vill koma á framfæri innilegum
þökkum til þeirra sem hlupu og upplýsa að framlög sem þessi skipta AO miklu máli fjárhagslega, auk þess sem málstaður félagsins verður sýnilegri.

Framlögum sem þessum er komið í góðan farveg innan félagsins og notuð til styrkveitinga en árlega eru veittir styrkir vegna ýmissa verkefna til að mynda endurmenntun lækna og hjúkrunarfólks og vegna rannsókna á sviði astma og ofnæmis. Slíkir styrkir koma skjólstæðingum okkar og öllu samfélaginu vel á endanum því sjúklingasamtök eins og AO eru í hópi þeirra aðila sem styrkja heilbrigðiskerfið í landinu, beint og óbeint. Okkar framlag snýr til dæmis að því að styðja heilbrigðisstarfsfólk til endurmenntunar og stuðla að því að rannsakaðar eru leiðir til að efla þekkingu og framfarir í læknavísindum er snúa meðal annars að astma og ofnæmi.

Takk fyrir okkur, hlauparar og Reykjavíkurmaraþon Íslandsbanka.

Fríða Rún Þórðardóttir

Formaður AO